Aanlynregistrasie
Die aanlynregistrasieproses open op Maandag, 16 April 2018 om 08:00. Let wel dat elke voornemende leerder by 5 skole kan registreer.
1. Gaan na http://www.gdeadmissions.gov.za.
2. Stap 1: Voer die ouerinligting noukeurig in. Dit sluit ‘n paar sekuriteitsvrae in, asook die kies van ‘n gebruikersnaam (username) en kodewoord (password). Vergewis uself van die terme en voorwaardes en klik die “Terms and conditions”-blokkie. Hierna klik u op “Submit”. Indien hierdie stap volledig voltooi is, sal die blokkie groen word en u sal na die volgende gedeelte van die aansoek beweeg. Bewaar u gebruikersnaam en kodewoord vir toekomstige aanlynnavrae oor u leerder se registrasie (u sal dit benodig vir login).
3. Stap 2: Voltooi vervolgens die leerderinligting en klik op “Submit”, sodat hierdie blok ook groen vertoon en u lei na die volgende stap.
4. Stap 3: Aansoek (“Application”): Ouers kan aansoek doen by ‘n spesifieke skool op grond van huisadres, werksadres, broer of suster in die skool (slegs graad 8 tot 11) of vorige skool. Die opsie van “Skool van keuse”, sal ook beskikbaar wees, indien u nie kwalifiseer op grond van enige van die genoemde kriteria nie. U sal op die B-waglys geplaas word by die skool van u keuse. Dit is raadsaam om indien u van die skool se koshuisfasiliteit gebruik wil maak, u ‘n koshuisaansoek saam met u aansoek indien. Die Hoërskool Menlopark se koshuis verskyn nie op die keuselys nie, maar koshuisverblyf word deur die skool self behartig.
Gebruik altyd die naaste moontlike adres aan die skool, tydens die aansoekproses.
5. Wanneer u op “Apply” klik, sal u ‘n registrasie bevestigingsnommer ontvang wat as bewys dien dat u wel aansoek gedoen het.
6. Indien u op ‘n WA-waglys geplaas word by ‘n ander skool, doen weer aansoek (“Apply again”), en gebruik “Skool van keuse” om ‘n waglysnommer vir Menlopark te bekom.
Die WA-nommer dui aan dat u volgens die kriteria van die departement kwalifiseer vir daardie spesifieke skool.
Die WB-nommer dui aan dat u “Skool van keuse” gekies het, en toegelaat sal word op grond van beskikbaarheid.
Die WAB-nommer dui aan dat die stelsel nie u adres kon opspoor nie - die skool sal u adres verifieer.
7. U sal ‘n SMS ontvang van die Departement van Onderwys wat u aansoek bevestig.
8. Ons sal u op hoogte hou van die verloop van die proses.
