Registrasie 2021
Interhoër span die kroon op uitstekende atletiekseisoen
2020 is skaars uit die wegspringblokke of die Menlo-atlete ryg die een atletiekprestasie na die ander in. Nie net is Menlopark die Twizza-kampioene nie, maar spog ons nou met nog ʼn veer in die atletiekhoed. Nadat die Menloparkers die A-bond interhoër vir die negentiende maal gewen het, is daar nou geen twyfel meer nie – ons atlete kán! Nie net is Menlopark aangewys as algehele wenners van die byeenkoms nie, maar Menlopark loop ook weg met die trofee in die dogtersafdeling en die seunsatlete behaal die tweede plek. Baie geluk aan elkeen betrokke.
Alhoewel die interhoër ʼn atletiekbyeenkoms is, het elke Parkie bygedra tot die oorwinning. Die ondersteuners wat bankvas op die pawiljoene gesit het, het die atlete gedra. Krete van aanmoediging het nuwe lewe in moeë bene geblaas en die bene het gehou! Die reserwes het die hele seisoen geoefen, gereed om enige tyd in te staan en gereed om in hulle spanmaats se vreugde te deel. Die atlete was die vaandeldraers – die voorlopers op wie se skouers ʼn reusetaak gerus het. Elkeen van hulle het dapper aangetree om te doen wat gevra is. Op die agtergrond was daar afrigters en onderwysers wat ʼn onskatbare bydrae gelewer het tot die suksesverhaal van interhoër – ons salueer julle elkeen.
Baie dankie aan elke Menloparker wat gehardloop het met die visie om interhoër te wen. Die hoogste (verste en vinnigste) is nagestreef.
Menlo-matrieks blink uit!
Menlo-matrieks blink uit met 'n slaagsyfer van 100%, ‘n graadgemiddeld van 72.2% en graadvrystelling van 97.78%!
Ons 316 matrieks behaal 751 A’s en 690 B’s.
Baie geluk aan elkeen wat met harde werk hulle beste gelewer het en so goed presteer het!
9 A's: Denae Lubcker en Kiara Pieterse.
8 A's: Natalie Hanekom, Klara Eybers, Lise Prinsloo, Johan Human, Barend Nel, Stegmann Kruger, Waldo Botha, Rolien Bührnann, Jade Penning, Stephanie Foord, Lisa Becker & Joshua Niemand.
7 A's: Karmen Wiid, Renita du Toit, Megan Oosthuizen, Gideon Munnik, Rikus van Niekerk, Mia du Plessis, Catherine Wilcocks, Hanrie Louw, Ivana Venn, Danielle Mook, Daniélle Niemand, Ilze Bellingan, Helen Wilson, Rouxan le Roux & Wayne Willemse,
Toppresteerders: Natalie Hanekom en Karmen Wiid met 'n gemiddeld van 93.6%.
Menlopark is Virseker Beker-kampioene!
Hartlik geluk aan ons eerste rugbyspan wie vir die eerste keer in die skool se geskiedenis die VirSeker Beker gewen het deur Helpmekaar Kollege in die finaal te wen. Dit is nou absolut rugby!
Die Poort publiseer aspirantskrywers!
Die Suid-Afrikaanse Akademie vir Wetenskap en Kuns is ʼn multidissiplinêre organisasie wat hom beywer vir die bevordering van die wetenskap, die tegnologie en die literatuur in Afrikaans en die kunste. Die organisasie het oor die jare bekendheid verwerf vir onder andere die gereelde toekenning van literêre pryse, asook vir sy publikasies waaronder twee gereelde tydskrifte en talle geleentheidspublikasies.
Die POORT-skryfkompetisie, wat deur die organisasie aangebied word, vind al sedert 1971 plaas. Hierdie kompetisie groei jaarliks en het ten doel om skeppende skryftalent in Afrikaans onder hoërskoolleerders te ontdek.
Verskeie aspirantskrywers se werk sal vanjaar in Die Poort publikasie opgeneem word en ons is baie trots op die volgende Menloparkers en voormalige Menloparker wie se werk in die publikasie sal verskyn:
Poësie
Danie Schutte (Graad 11): Mozart se Onweersimfonie (volg gerus die skakel na nog een van Danie se meesterstukke: Train.)
Lize Bekker (Graad 12): Verskillend
Karmen Wiid (Graad 12 in 2019): 1 425.3 kilometer; April se trane; Gedagtes uit Wellington oor ʼn tyd lank verby & Tuinmaker
Prosa
Karmen Wiid: Die laaste trein
Baie dankie aan me. Nerine Ahlers en haar kollegas in die Departement: Afrikaans vir hulle waardevolle insette en belegging in Menlo se jong skrywers.
