Die Hoërskool Menlopark

Menlo-Wiskunde se uitslae skitter jaarliks!

Menlopark is trots om van die grootste persentasie leerders wat Wiskunde as vak neem, in die distrik te hê.

 Ons  is dankbaar dat ons matrieks se uitslae ons elke jaar onder die top 10 skole met die meeste onderskeidings landswyd plaas . 

Tog gaan dit by Menlo-Wiskunde nie net oor die onderskeidings nie, maar oor heelbrein-onderrig en die  ontwikkeling van alle leerders in dié linkerbreingeoriënteerde vak. Ons is bevoorreg om ‘n data-projektor in elke klas te hê waar klem o.a op die visuele wonderwêreld van funksies en transformasies val.  Ons poog om in die klas vir die skrander leerders uitdagings te bied en terselfdertyd die angel van Wiskunde uit te haal vir dié wat ‘n vrees vir die vak het.  

 Menlo se Wiskunde onderwysers - almal met ‘n besondere passie vir die vak - loop graag toegewyd die ekstra myl  om leerders te help en te motiveer, d.m.v gratis ekstra klasse en informele werksessies na skool. Vir die matrieks word  ‘n Slypskool gedurende ses 2 uur-sessies in die Derde Kwartaal na ure aangebied, waar leerders se kennis skerp gemaak word vir die Rekordeksamen. Die Menlo-kampusrooster in die Vierde Kwartaal, sorg vir die finale afronding voor die Eindeksamen. Ons onderwysers glo in volgehoue leer en selfontwikkeling. Hulle woon gereeld kursusse en seminare by om voort te bou op hul kennis en onderrigstrategieë en by te bly by nuwe tendense.

Met die Wiskunde Olimpiade sê meer as 200 leerders mekaar die stryd met laterale wiskundige denke aan, en is die saal stampvol wiskundige wenners. Menlopark skitter ook jaarliks met prestasies in die verskeie Wiskunde Olimpiades- van Amesa tot Media 24 se aanlyn-olimpiade.

Tyd vir speel is maar min, maar by die  juniors word Veelvlakke met Jelly Tots  visueel uitgebeeld en speel-speel en kou-kou vind leer ook plaas

Menlo-leerders met ‘n groot belangstelling in Wiskunde, wat Ingenieurswese of Aktuariële Wetenskap wil studeer, neem graag Alpha Wiskunde as vak. Elke jaar is daar van die Menlo-leerders onder die top 5 presteerders in Alpha landswyd. Menlopark bied Alpha Wiskunde vir graad 9 tot 12 leerders  as addisionele vak  by die skool aan.  Belangstellendes kan gerus kontak maak met mnr. Johan Grove by Hierdie e-posadres word van Spambotte beskerm. Jy moet JavaScript ontsper om dit te lees. 

By Menlopark poog ons om leerders  nie net met wiskundige boekekennis toe te rus nie. Leerders moet vir hulleself kan dink en die wêreld daarbuite probleemoplossingsgerig  aanpak!

Wiskundige Geletterdheid

In hierdie vak doen ons Wiskunde in konteks. Waar die wiskundiges die verlore x soek en vind, werk ons die ware Jakob in konteks uit.

Hierdie vak bestaan uit:

Finansiële Wiskunde

Meting

Datahantering 

Waarskynlikheid

Hier kan ons ook spog met heelwat onderskeidings elke jaar en leerders wat in die top 20 eindig met die prys uitdeling! Ons 2018-matrikulante het ’n gemiddeld van 71% in hulle eindeksamen behaal. Hierdie vak maak werklik deure oop vir ons leerders.

Ons neem ook jaarliks deel aan ’n landwye olimpiade. Hierdie leerders is reg vir enige uitdaging.

Ons bied die vak vanaf graad 10 aan. Teen matriek is die leerders vertroud met die inhoud van die vak en kan hulle die eksamen met selfvertroue aanpak

Vir enige navrae kontak mev. Elza Truter. Hierdie e-posadres word van Spambotte beskerm. Jy moet JavaScript ontsper om dit te lees.